vn pied sur vne selle, l’autre sur l’autre, portant vn second sur ses bras, piquoit à toute bride : ce second tout debout, sur luy, tirant en la course, des coups bien certains de son arc. Plusieurs, qui les iambes contre-mont, donnoient carrière, la teste plantée sur leurs selles, entre les pointes des simeterres attachez au harnois. En mon enfance le Prince de Sulmone à Naples, maniant vn rude cheual, de toute sorte de maniemens, tenoit soubz ses genouz et soubs ses orteils des reales : comme si elles y eussent esté clouées : pour montrer la fermeté de son assiette.
CHAPITRE XLIX.
’excvserois volontiers en nostre peuple de n’auoir autre patron et
règle de perfection, que ses propres meurs et vsances : car c’est
vn commun vice, non du vulgaire seulement, mais quasi de tous
hommes, d’auoir leur visée et leur arrcst, sur le train auquel ils
sont nais. Ie suis content, quand il verra Fabritius ou Lælius, qu’il
leur trouue la contenance et le port barbare, puis qu’ils ne sont ni
vestus ny façonnez à nostre mode. Mais ie me plains de sa particulière
indiscrétion, de se laisser si fort piper et aueugler à l’authorité
de l’vsage présent, qu’il soit capable de changer d’opinion et d’aduis
tous les mois, s’il plaist à la coustume : et qu’il iuge si diuersement
de soy-mesme. Quand il portoit le buse de son pourpoint entre
les mammelles, il maintenoit par viues raisons qu’il estoit en son
vray lieu : quelques années après le voyla aualé iusques entre les
cuisses, il se moque de son autre vsage, le trouue inepte et insupportable.
La façon de se vestir présente, luy fait incontinent condamner
l’ancienne, d’vne resolution si grande, et d’vn consentement
si vniuersel, que vous diriez que c’est quelque espèce de manie, qui
luy tourneboule ainsi l’entendement. Par ce que nostre changement
est si subit et si prompt en cela, que l’inuention de tous les tail-
