vne mesme lettre : nous voyons des œufs, des boules, des aisles, des haches façonnées anciennement par les Grecs, auec la mesure de leurs vers, en les alongeant ou accoursissant, en manière qu’ils viennent à représenter telle, ou telle figure. Telle estoit la science de celuy qui s’amusa à compter en combien de sortes se pouuoient renger les lettres de l’alphabet, et y en trouua ce nombre incroyable, qui se void dans Plutarque. Ie trouue bonne l’opinion de celuy, à qui on présenta vn homme, apris à ietter de la main vn grain de mil, auec telle industrie, que sans faillir, il le passoit tousiours dans le trou d’vne esguille, et luy demanda Ion après quelque présent pour loyer d’vne si rare suffisance : surquoy il ordonna bien plaisamment et iustement à mon aduis, qu’on fist donner à cet ouurier deux ou trois minots de mil, affin qu’vn si bel art ne demeurast sans exercice. C’est vn tesmoignage merueilleux de la foiblesse de nostre iugement, qu’il recommande les choses par la rareté ou nouuelleté, ou encore par la difficulté, si la bonté et vtilité n’y sont ioinctes.Nous venons présentement de nous iouër chez moy, à qui pourroit trouuer plus de choses qui se tinsent par les deux bouts extrêmes, comme, Sire, c’est vn filtre qui se donne à la plus esleuée personne de nostre Estat, qui est le Roy, et se donne aussi au vulgaire, comme aux marchans, et ne touche point ceux d’entre deux. Les femmes de qualité, on les nomme Dames, les moyennes Damoiselles, et Dames encore celles de la plus basse marche. Les daiz qu’on estend sur les tables, ne sont permis qu’aux maisons des Princes et aux tauernes. Democritus disoit, que les Dieux et les bestes auoient les sentimens plus aiguz que les hommes, qui sont au moyen estage. Les Romains portoient mesme accoutrement les iours de dueil et les iours de teste.Il est certain que la peur extrême, et l’extrême ardeur de courage troublent également le ventre, et le laschent. Le saubriquet de Tremblant, duquel le XII. Roy de Nauarre Sancho fut surnommé, aprend que la hardiesse aussi bien que la peur engendrent du trémoussement aux membres. Ceux qui armoient ou luy ou quelque autre de pareille nature, à qui la peau frissonoit, essayèrent à le rasseurer ; appetissans le danger auquel il s’alloit ietter : Vous me cognoissez mal, leur dit-il : si ma chair sçauoit iusques où mon courage la portera tantost, elle se transiroit tout à plat. La foiblesse qui nous vient de froideur, et
