est gênerai, commun, et iuersel.Mourir de vieillesse, c’est vne mort rare, singulière et extraordinaire, et d’autant moins naturelle que les autres : c’est la dernière et extrême sorte de mourir : plus elle est esloignée de nous, d’autant est elle moins esperable : c’est bien la borne, au delà de laquelle nous n’irons pas, et que la loy de Nature a prescript, pour n’estre point outre-passée : mais c’est vn sien rare priuilege de nous faire durer iusques là. C’est vne exemption qu’elle donne par faueur particulière, à vn seul, en l’espace de deux ou trois siècles, le deschargeant des trauerses et difficultez qu’elle a ietté entre deux, en cette longue carrière. Par ainsi mon opinion est, de regarder que l’aage auquel nous sommes arriuez, c’est vn aage auquel peu de gens arriuent. Puis que d’vn train ordinaire les hommes ne viennent pas iusques là, c’est signe que nous sommes bien auant. Et puis que nous auons passé les limites accoustumez, qui est la vraye mesure de nostre vie, nous ne douons espérer d’aller guère outre. Ayant eschappé tant d’occasions de mourir, où nous voyons tresbucher le monde, nous deuons recognoistre qu’vne fortune extraordinaire, comme celle-là qui nous maintient, et hors de l’vsage commun, ne nous doibt guère durer.
C’est vn vice des loix mesmes, d’auoir cette fauce imagination : elles ne veulent pas qu’vn homme soit capable du maniement de ses biens, qu’il n’ait vingt et cinq ans, et à peine conseruera-il iusques lors le maniment de sa vie. Auguste retrancha cinq ans des anciennes ordonnances Romaines, et déclara qu’il suffisoit à ceux qui prenoient charge de iudicature, d’auoir trente ans. Seruius Tullius dispensa les Cheualiers qui auoient passé quarante sept ans des cornées de la guerre : Auguste les remit à quarante et cinq. De renuoyer les hommes au seiour auant cinquante cinq ou soixante ans, il me semble n’y auoir pas grande apparence. Ie serois d’aduis qu’on estendist nostre vacation et occupation autant qu’on pourroit, pour la commodité publique : mais ie trouue la faute en l’autre costé, de ne nous y embesongner pas assez tost. Cettuy-cy auoit esté iuge vniuersel du monde à dixneuf ans, et veut que pour iuger de la place d’vne goutiere on en ait trente.Quant à moy i’estime que nos âmes sont desnoüées à vingt ans, ce qu’elles doiuent estre, et qu’elles promettent tout ce qu’elles pourront. Jamais ame qui n’ait donné en cet aage là, arre bien euidente de sa force, n’en donna
