Qui si grant guerre as eu, ainçois (avant)
Que bien t’en prensist (prit), se peu non ;
Mais, Dieu grâce, or voiz ton renon
Hault eslevé par la pucelle,
Qui a soulzmis soulz ton penon
Tes ennemis, chose est nouvelle !...
Et j’ay espoir que bon seras
Droiturier et amant justice,
Et tous autres passeras,
Mais (pourvu) que orgueil ton fait ne honnisse ;
A ton pueple doulz et propice,
Et craignant Dieu qui t’a esleu
Pour son servant, si com prémisse
En as, mais que faces ton deu (devoir)...
Et toy, pucelle béneurée,
I dois-tu estre obliée,
Puisque Dieu t’a tant honnorée.
Que as la corde desliée
Qui tenoit France et estoit liée ?
Te pourroit-on assez louer,
Quant ceste terre humiliée
Par guerre, as fait de paix douer ?...
Considérée ta personne
Qui es une jeune pucelle,
A qui Dieu force et povoir donne
D’estre le champion, et celle
Qui donne à France la mamelle