Aaron, li rois de Perse, li ot envoié. À la parfin, quant ses oz furent assemblées, il mut au plus hastivement que il pot, droit au flum d’Alaran[1]. Ses Herbeges fist tendre sor le rivage de cele iaue, là endroit où ele assemble au flum de Wisare. Iluec demoroit pour oïr noveles de ses anemis et pour oïr les menaces Godefroi le roi des Danois ; car cil rois estoit si enflez d’orguel et si plains de vaine gloire pour la victoire que il avoit eue des Frisons, que il se vantoit et disoit que il se combatroit contre l’empereor à jor nomé en champ de bataille.
Endementres que li empereres demoroit en ce lieu, li furent aportées diverses noveles de diverses parz, car il li fu conté pour voir que la navie des Danois, qui Frise avoit gastée, s’en estoit retornée, et li rois Godefroiz occis d’un sien serjant maismes, mais la raison ne la maniere de sa mort ne raconte pas l’estoire. Et si li refu conté que li Vuilze avoient pris le chastel de Hobuki[2] qui siet sor le rivage d’Albe. En ce chastel, estoit Huedes, i messages l’empereor, et plusor des Saines orientiex, et si li refu raporté que ses fiuz Pepins, li rois de Lombardie, estoit trespassez de cest siecle en viiie yde de juim[3], et si li fu dit au derenier que ii legations de ii parties estoient à li venues pour confirmation de pais ; l’une de par l’empereor de Costantinoble, et l’autre de par l’aumaçor
